Fochi e Vita

Pessatinni e veni chici accultu, accultu

a chistu focu d'ita chi sé drummendi.

Cumencia tuttu dall'abbruncu, cussì

comu l'amori e l'imbriziolu di li cioani.

Pianu pianu, si tulcinigghjani li frondi

comu la femina accultu a l'omu, e pianu

pianu cresci chistu focu di criaturi.

Schintiddhi e fiami alti

è lu jocu di la vita,

e passani l'anni fatti d'amori e di brei

di fiddholi e di trabaddhi

Brusgia, e si spigni chidda luci

brusgiani, e s'accendi lu bugghju

brusgiemu e si spigni lu cori.

Ma chistu è solu lu cumencio

che di fochi e d'amori e d' ita

s'innaccendini in dugna mumentu.